कविता /महुआ -लक्ष्मी लहरे

कविता /महुआ

————–

पिंवर पिंवर दिखत हे

डारा पाना संग झूलत हे

नोनी के दाई बिनसरिहा ल महुआ ल बिनत हे

बरछा के मेड म

हावे महुआ के कोरी अकन पेड़

बरछा ह महमहावत हे

मन ह हरसावत हे

मीठ मीठ महक ले

बरछा ह महकत हे

रस्दा रेंगईया मन महुआ ल देखत हें

नोनी के दाई कोंघर के महुआ ल बिनथ हे

बिन बिन के झांहु म धरथ हे

महुआ ल बिन के रोजी रोटी चलथ हे

महुआ के हावें अबड़ मान

देवी – देवता के भोग म चढ़त हे

जिनगी के संदेस छुपे हावे महुआ म

भुईंया म गिर के सुघ्घर महकत हे

जिनगी के मीठ मीठ संदेस देवथ हे

पिंवर पिंवर दिखत हे

डारा पाना संग झूलत हे

बरछा ह महमहावत हे

जिनगी के सुघ्घर संदेस गुंगुनावत हे

लक्ष्मी नारायण लहरे ” साहिल ”